Rev 17 | MMX | STEP | La lara atdi na lavanuti lubungangelo, mo digam tebeng mo lavanuti leventingtigon, ga vot pasa ia la ga lok, “Pen ba i na, la ana lox ase u mi losongsongot silok, ne Moroa naba sep mo latkin ngarangat min, mo it kis saparap laxan taadan solo.

Revelation of John 17

Latkin Ngarangat

1 La lara atdi na lavanuti lubungangelo, mo digam tebeng mo lavanuti leventingtigon, ga vot pasa ia la ga lok, “Pen ba i na, la ana lox ase u mi losongsongot silok, ne Moroa naba sep mo latkin ngarangat min, mo it kis saparap laxan taadan solo. 2 Lavaorong silok axap at na lavatbung menemen digang longka i la limixin at na lavatbung menemen diga lok laxakapmek min, i lok ngan ta do diga inin tangtangku mi lavaen.”

3 La Loroonan Kaala ga vubeles tarak la nom laangelo ga xip kaka ia uto at lamatbin. La nia aga ven lara latkin gat kis to vana at lara lavatpanga sio ga memele aleng la ga ruuna lavanuti lempatlak la lasangaun lempatkom; la laxanasen kapmek, ni levelinga vupu ri ne Moroa ga umsu at labantuxu ren. 4 Na latkin ga sigaara mi lisingsiga ga memele aleng la ga umsu mi logol eburu mi lengkonuat gamgames, luunun silok ap mo lengkonuat; la leven peal inbun gak lok bok ap mo lisingsigaara ren. Ni gam tebeng lavattingtigon gol ga umsu mi laxangkakapmek teren eburu mi libilinga at loklok teren. 5 La levelinga ga nemen to at lamang teren ketla lavasuun teren goxo xasep. Mo levelinga ga lok keretna,

“Lemenemen silok Babilon, ni lavasuun at loklok ngarangat la neni bok lavatturunen at leveloklok kakapmek axap at na lavatbung menemen.”
6 La nia aga ven mo latkin ga inin tangtangku mi lada at limixin at ne Moroa, la atnedi bok limixin diga met mila diga nuunu at ne Iesu.

Se nia aga ven i, aga sangu aleng. 7 Ketla laangelo ga lok tia, “Tila u sangu? Ana soxomus lavasuun at nom latkin eburu mi lavatpanga sio, neni it kis pana ren, la i ruuna lavanuti lempatlak teren la lasangaun lempatkom. 8 Mo lavatpanga sio ga rooro gano, kopmen na rooro lingina, ketla melemu naba vasu boro at lemeroon la ba seeve to at lemenemen songsongot. La nedi limixin at na lavatbung menemen, kopmen levenasen atnedi goxok lok keneng at lubuk at lorooro, ga ru ka i at lurutu kaxat at na lavatbung menemen, dinaba sangu aleng do dina ven na lavatpanga sio. Neni ga rooro be, ketla monga neni kopmen na rooro, ketla naba rupot melemu.

9 Do tara i vara na xasep at na, neni na doma mumu avukar i. Mo lavanuti lempatlak i ru katling lavanuti lengkongkaana la latkin ngarangat it kis to mavana atdi. La mo lavanuti levempatlak i ru katling bok lavanuti lavaorong silok. 10 La lavalimo atdi diga met pam, la legesara atdi mo nga it kis ngan loorong silok; la legesara bok ba vot ketla ba nemen at lentaba levenaleng mun. 11 La lavatpanga sio, mo ga rooro la na nga i met pam, neni loorong silok sepsev avanuan; la neni bok lara atnedi lavanuti lavaorong silok la ni naba seeve.

12 La mo lasangaun lempatkom nenu ura ven pam i, di ru katling lasangaun lavaorong silok kovisi dina lok ka lixitkis atdi kusu dinam gomgo ri limixin. Ketla nedi eburu mi lavatpanga sio diba lok ka lololos ngan lavaorong silok at lavanna sangaun minit mene. 13 La nedi diba ruuna legesa doxoma mun la diba raba lavatpanga sio mi lololos atdi la diba mumu asu i. 14 La na lavatpanga sio eburu mi lasangaun lavaorong silok diba esep eburu mi Lanasip. La Lanasip eburu minedi neni ga ro xaka di, la nedi bok neni ga soxolik ka di la nedi bok di mumu asu ruturun i, diba sak tup mi na lavatpanga sio eburu mi lasangaun lavaorong silok, mila Lanasip neni Leeme Silok mavana at lavaeme silok axap la neni Loorong Silok mavana at lavaorong silok.”

15 La nom laangelo ga lok bok tia, “Mo laxantaadan nenu ura ven pam i, la latkin ngarangat it kis saparav i, ni i ru katling limixin boro at levenasen bantuxu, la boro at larabung mixin axap, la boro at levennep silok axap, la boro at levempapaase axap. 16 La mo lavatpanga sio eburu mi lasangaun levempatkom nenu ura ven pam i, nedi diba munepen mi latkin ngarangat. Diba lok kapmek tinotno i la diba ke i nak lok beleben; la diba anan levenbaaxin teren la diba xotos labantuxu ren mi laxao. 17 Diba lox i na mila ne Moroa ira lok pam di xusu dina mumu asu lodoxoma at ne Moroa. Kuren la diba mulus kusu dina raba axap lololos atdi ri lavatpanga sio la neni naba lok lugugu ren min, ba se at levelinga at ne Moroa mumu na levesongsongot naba sorun. 18 La mo latkin ngarangat ura ven i, i ru katling mo lemenemen silok, ni imgomgo ri laramenemen silok at lavaorong silok at na lavatbung menemen.”